સોમનાથ મંદિરમાં લોકોની સુવિધામાં વધારો, બિલ્વપુજા સેવાનો પ્રારંભ

  • vatannivat
  • 30-01-2023 09:34 AM

- માત્ર રૂ  ૨૧ માં સોમનાથ મહાદેવને બિલ્વપત્ર અર્પણ કરી શકાશે

- સોમનાથ ટ્રસ્ટે શિવરાત્રીના પર્વ પર ભક્તો માટે લોન્ચ કરી "બિલ્વપુજા સેવા"

સોમનાથ પરિસર ખાતેથી લોન્ચ થઇ બિલ્વપુજા સેવા

સોમનાથ ટ્રસ્ટે શિવરાત્રીનાં પાવન પર્વ પર ભક્તો માટે "બિલ્વપુજા સેવા" લોન્ચ કરી છે. જેના દ્વારા માત્ર ૨૧ રૂપિયાની ન્યોછાવર રાશિ સાથે કોઈપણ ભક્ત તરફથી સોમનાથ મહાદેવને બિલ્વપત્ર અર્પણ કરી શકાશે. રાજ્ય સરકારના વન પર્યાવરણ અને પ્રવાસનમંત્રી મુળુભાઈ બેરા, શિવ દરબાર આશ્રમના ઉષા મૈયા, મહામંડલેશ્વર રમજુબાપુ તથા સોમનાથ ટ્રસ્ટના મહાનુભવો દ્વારા આ પૂજાસેવા સોમનાથ પરિસર ખાતેથી લોન્ચ કરવામાં આવી છે. વડાપ્રધાન નરેન્દ્ર મોદી જેઓ સોમનાથ ટ્રસ્ટ ના અધ્યક્ષ છે અને સોમનાથ યાત્રાધામ ના સર્વગ્રાહી વિકાસ માટે સતત માર્ગદર્શન આપી અનેક સુવિધાઓ સોમનાથ ટ્રસ્ટ દ્વારા વિકસાવી રહ્યા છે. તેમની પ્રેરણાથી આ બિલ્વ પૂજા સેવાનો પ્રારંભ કરવામાં આવ્યો છે.

આ રીતે બિલ્વ પૂજા નોંધાવી શકશે

શાસ્ત્રોમાં કહેવાયું છે કે શિવજીને બીલીપત્ર અર્પણ કરવાથી ગત ત્રણ જન્મોના પાપો નાશ પામે છે. ત્યારે પ્રથમ જ્યોતિર્લિંગ સોમનાથ મહાદેવને બીલીપત્ર પૂજન કરવાના પુણ્યની સાથે સોમનાથ ટ્રસ્ટ લોકોના આપેલા એડ્રેસ પર બિલ્વ પૂજાના બીલીપત્ર પ્રસાદ સ્વરૂપે પણ મોકલશે. આ અદભુત બિલ્વ પૂજામાં ભાગ લેવા માટે ભકતો સોમનાથ ટ્રસ્ટની વેબસાઈટ પર જઈને પુજા નોંધાવી શકશે અથવા ટ્રસ્ટ દ્વારા નવી શરૂ કરાયેલ મિસ કોલ સુવિધામાં નંબર ૦૮૦-૬૯૦૭૯૯૨૧ પર મીસકોલ કરીને સરળતા પૂર્વક ઓટોમેટિક વોઇસ રજીસ્ટ્રેશન માધ્યમથી પૂજા નોંધાવી શકાશે.